Tqanqila.

 

Għaliex se nibqa’ ngħanni għanja waħda

Għalkemm it-test u n-noti ma naqrax?

It-temp u r-ritmu jien ma nafx inżommhom,

U żmien sabiex nitgħallem ma baqax.

 

Għaliex qed ngħanni l-għanja li semmajtli?

Ħelwin in-noti li qatt ma tgħallimt

Ir-rima ma tiġix, ma nafx mnejn nibda,

Din kantaliena li jien qatt ma fihmt.

 

Għaliex irrid ngħidhielek kif inħossha

U ngħidha bl-inqas ħoss tkarkir ta’ xejn,

Għalkemm mhu qed ngħid xejn griżmejja nixfu,

’mma rrid xi ħaġa ngħid, ma nafx għalfejn.

 

Għax jista’ jkun li tkun imbuttatura

Inkella nibqa’ hawnhekk u bejn ħalltejn

Għax jista’ jkun li tkun biss illużżjoni:

Tkun taf li minn dak kollu ma kien xejn.

 

Għaliex imbagħad fis-skiet tas-solitudni

Irridek tibqa’ għaddejja u tgħid li trid?

Imqar jekk dak li tgħid ma tantx jinftiehem

Inħossni nogħola ’l-fuq mingħajr ma rrid.

 

Għax jista’ jkun ukoll li jien fis-sakra

Inkella nsejt ma mbagħad nafx fejn jien

Li jien m’għandix min-nies ta’ din id-dinja

Għid kemm trid, jew li ma jesgħani mkien.

 

Alfred Grech.

03/09/2020.