Lil Oliver Friggieri.

 

Hekk toħroġ il-karba xħin jieqaf is-sider tiela’ u nieżel

Għaliex imbagħad il-ġisem ma jiflaħx

Iġorr it-toqol tar-ruħ li ħaddnet l-univers

U sawwret dinja ġdida.

Għaliex mingħajr in-nar li ntefa’ qajla

tista’ tkebbes u ssaħħan dak li nħema.

U jien irrid inżid tiegħi

Mal-ilħna li sellmulek għall-aħħar darba.

 

Kliem jien m’għandix biex inlissen

It-toqol tat-tifsira,tat-telfa.

Xi tkexkixa ġġib il-mewt?

 

Niftakar meta għallimntni  ngħolli s-siparju

U nċarrat dak l-istar li ħeba tant misteri

Iċ-ċpar li ma kien xejn

Iċ-ċpar tal-perċezzjoni.

 

Int għentni wkoll insib it-triq li kont tlift ilu

U nġonġi t-trufijiret biex nerġa’ ninseġ

L-ilwien evanexxenti ta’ tela dejjiema

Imbagħad insewwasq bdejt il-gliegel

Tal-ilma ġieri

Li ħareġ min-nixxiegħa

Li jien ma stajtx inżomm,

Li ħadd ma seta’ jżommu.

 

Int kont il-kewkba ta’ filgħodu tnebbaħ

Qawmien ġdid ta’ trasfigurazzjoni

U kont ukoll il-kewkba li mal-għabex

Tħenni l-qalb ta’ min jistenna l-ħemda.

 

Mur ħabib, għannej, għalliem bniedem ħassiebi

Fil-vjaġġ ta’ bla ritorn għan-naħħa l-oħra

Imbagħad xħin tmiss bil-ponta ta’ subgħajk wiċċ l-ilma

Għidilna jekk ix-xbieha titħassarx.

 

Alfred Grech

24/11/2020