Jien Naf.

 

Jien naf għaliex ma tridx qatt terġa’ lura

Ħamiema tat-tamiet u tal-ġejjieni

Għax sirt esploratur ta’ dinja ġdida

Inkella ġibt il-bnazzi xħin kien spiċċa

Id-dulluvju, u tfittex il-quċċata

Fejn tista’ tmidd riġlejk u tieqaf taħseb

U tara jekk hux għaqli din il-ġirja

Sa tarf l-irjieħ.

Illum int qed tkellimni mingħajr biża’

Mingħajr ma tuża’ kliem inkella leħnek

Jien naf għaliex sal-lum int bqajt itittajjar

Tintfiehem biss minn dawk tal-wegħediet fiergħa

U dawk li mingħalihom sabu posthom

U wieħed minnhom stajt kont jien fil-biża’ tiegħi

Inkella l-ħolm li ħlomt mingħajr sekwenza

Bħal dik il-poeżija ta’ bla rima. . . .

 

Inkella għax sibna ruħna mwarrba u mitluqa

Għal-ġenb tat-triq.

 

Alfred Grech

23/04/2021