Ejja Ngħidu Li M’hemmx Għada.

 

Ejja naħsbu li mhemmx għada

Jekk illum ninsabu sew;

Ejja ngħidu: hawn se nibqgħu

Għalfejn toħroġ min hawn ġew?

 

Ejja ngħidu l’hawn se nibqgħu

Għaliex għada ma taraħx,

Fejn hu dak li jrid iħabbat

Il-bieb baqa’ ma nfetaħx?

 

Fejn hu dak li jrid jisfida?

Żmien għaddeju ma ġara xejn,

Fejn hu dak li baqa’ tiela’

Sal-quċċata imma għalxejn?

 

Ejja ngħidu li m’hemmx għada

Kollox ħolm u qatt ma jkun,

Niktbu l-ġrajja li titħassar

U l-aħbar ħażina tkun.

 

Ejja ngħidu li m’hemmx għada

U ma tkunx daqshekk ħabriek,

Għandu kollox imur sewwa

Għalxejn toqgħod fuq ix-xwiek.

 

Alfred Grech

26/03/2022