Refuġjati. (Ode).

 

Kif sejjer tħaddan id-dieqa li ċċarrat

Kull biċċa minn ruħhek, dir-ruħ li tfittex

Fil-ħemda kull għelm ta’ tama

F’did dinja mimlija ħsejjes tal-qieda?

 

Kif ser nimlew bi ftit tat-tama

lil-dawk li ġejjin mill-bogħod

Jaħarbu l-infern u d-dulluvju

Tal-bombi bla rażan fuq rashom

Tal-bini qed jiġġarraf?

 

Kif ser nilqgħuhom lil dawn it-trabi

Li malajr saru qalbiena

Suldati li twieldu fl-eqqel tat-taqbida?

Juruk uċuħ ġodda joqorbu mill-bogħod

Imwieżna fit-toqol

Itertru bil-bard.

Dawn mhumiex anġli

Dawn saru l-ereżeċitu

Li jwaqqaf il-ħbit.

 

Dan huwa żmien ta’ wara s-sewwa

Żmien il-gideb u d-disgwid

Dan hu żmien fejn min ixerred

il-velenu kullimkien.

Dan huwa żmien il-maskri

Dan hu żmien ta’ min jingħalaq fih innifsu.

 

Inħarsu lejn ix-xefaq

Nibilgħu d-duħħan

Nibdew xi jfisser nifhmu

It-tbatija tal-midrub

Ta’ min fuq rasu jaqla’

Ta’ m’għandux fejn jista’ jmur.

 

Issa li ddemm igelgel fit-toroq ta’ Kjiv

Xi kewkba għad titħaċċa biex tkaxkar xuxitha

Issa l-kummidjanti joħorġu fuq il-palk

Issa l-maskri grotteski mhux biss fil-karnival

Issa jfissrulna għaliex l-iġsma ta’ tfal bla ħajja

Mhumiex id-debħa ta’ blugħat il-kobor.

 

Alfred Grech

04/03/2022.

 

 

Comments

Post a Comment

Popular posts from this blog

Image
  F’Baħar Miftuħ.   F’baħar miftuħ ninġarru mal-kurrenti U nerġa’ nistaqsik: Minn fejn int ġejja? Bis-seħer nieżel għasel ġewwa sidri, Tifkira ta’ lejl li qatt ma jispiċċa.   U nerġa nistaqsik: Minn fejn int ġejja, Sultana li titfaċċa max-xemx tiela’, Tifkira ta’ lejl li qatt ma jispiċċa F’kunċert ta’ ħsibijiet li jġibek lura.   Sultana li titfaċċa max-xemx tiela’, Fuq xatt ir-ramel aktar mix-xemx jaħraq, F’kunċert ta’ ħsibijiet li jġibek lura, Inwaqqgħu swar li bnejt bit-tentazzjoni.   Fuq xatt ir-ramel aktar mix-xemx jaħraq, Għajnejna jiġġerrew lilhinn mix-xefaq, Inwaqqgħu swar li bnejt bit-tentazzjoni, Għad-dell ta’ xi żebbuġa tmil bit-tqala.   Għajnejna jiġġerrew lilhinn mix-xefaq, Ifittxu qtar in-nida tal-imħabba, Għad-dell ta’ xi żebbuġa tmil bit-tqala, Fejn kellna wileġ sħiħ sabiex noħolmu.   Alfred Grech 05/06/2023    
Read more
Image
  Kardinal.   U tista’ tilbes l-aħmar il-ħin kollu U ma tkun xejn għajr prinċep bħall-oħrajn U tibqa’ għaddej għax taħseb li ħadd bħalek U tinsa l-inti ukoll magħmul mit-tajn.   U tista’ titla’ wkoll fuq il-bradella, U tgħid u tagħmel ħafna għeġubijiet. U tħoll bħal silġa ’l-kull min qed jisimgħek U taf li dan duħħan xħin tkun fis-skiet.   U tista’ tagħmel naqxa bik innifsek U taħseb li b’hekk tkun sirt int qaddis In-nies tgħollik; tintefaħ bik innifsek U ma jkun xejn għajr kobba bit-tqasqis.   Alfred Grech 11/12/2020.
Read more
Image
  Lil Ommi.   U issa mqar jiena nħoss li m’għadnix magħkom M’għadnix hawn Għax qbist in-naħħa l-oħra tax-xmara Fejn ma jimpurtax hekk għada Baqax xi xemx li tista’ titla’ Inkella jekk l-ilwien li konna nżewwqu Tilfux il-lostru tagħhom.   Issa ninsab fis-sotterran tal-griż Fejn la hemm dlam u lanqas dawl Fejn il-biki biss hu t-tnegħida Illi toħroġ mir-ruħ li tibqa’ tnemnem Bħal musbieħ tat-trapasss lejn l- għabex etern. U hekk nista’ nibda ħajja ġdida Minflok l-irxoxt minn bejn l-imwiet. U issa bħal Scrooge Nibda’ nara l-futuribbli.   Alfred Grech 08-08-2022.  
Read more