Jien Xtaqt Ukoll.

 

Jiena xtaqt ukoll fuq fergħa ta’ xi sigra

nitla’ biex ngħanni sbieħ il-għodwa ġdida

u xtaqt ukoll fil-versi melodjużi

nintona tal-ħolqien u l-mewt nisfida.

 

Jien xtaqt ukoll inpinġi fuq xi tila

id-dellijiet ta’ sħab fis-sema jtellaq

Jew il-kwiekeb li naf ma nistgħax nilħaq

u nibqa’ għaddej għal dejjem bla ma nfellaq.

 

Lili jiblagħni d-dlam; il-baħħ quddiemi

jirbaħni x-xejn lil hinn mill-eqreb xefaq

Mhemmx ġejjieni;  hemm biss kudanna għal għomri

u nisfa’ id f’id bħal dak li kollox nefaq.

 

u ż-żmien f’dil-gaġġa illi l-għomor silef

hu dak ta’ għasfur li l-ħelsien tiegħu tilef.

 

Alfred Grech

07/09/2022.