Spiċċalhom l-Inċens.

 

Issa li dawk li naf tal-eta’ tiegħi

jew iżgħar bdew jitilqu wieħed wara l-ieħor

f’sekwenza li ħasdet ukoll ‘l-allat

li bdew nieżlin jitgerrbu minn fuq olimpu

aħna sibna li mxejna fit-toroq li ma jwasslu għal imkien

u ġrejna wara bżieżaq tas-sapun

biex nifqgħu il-ħolm li jwassal biss għall-ġenn.

Fid-dlam etern ta’ ġewwa fina

fittixna għalxejn il-lejl li qatt ma stajna nsibu

u mbagħad spiċċajna wkoll maħsula

bis-sokor tal-ħall imħallat mal-mirra.

 

Fil-boskijiet ta’ dinja magħmula mil-grattaċjeli

fid-daħna alluċinanti li timbuttak fir-ritmi ta’ kuljum

li tmur kontra l-kurrent tal ferħ imwiegħed.

 

Għax issa wkoll l-allat tneħħew minn fuq it-tron

u llum qed jiġġerrew fuq il-bankini tat-toroq ta’ kuljum

il-miti nfaqgħu mal-bombi li jkissru u jfarrku

id-djar tan-nies li m’għandhomx x’jaqsmu.

 

Għax issa n-nies lanqas għada temmen

fil-miti li ħolqu huma stess u fl-eroj li qajjmu mill-istorja

u lanqas f’din l-art ħelwa li għaliha nagħmlu kollox.

 

Għax issa wkoll iż-żmien li nkissru l-allat tat-tafal

dak kollu li mhux tassew u dak li huwa attaparsi

jew dak li s-soltu jsir jew kulħadd jagħmel.

 

Issa l-allat spiċċalhom  l-inċens

l-imperaturi sfaw għarwiena

u d-dittaturi nqlew fiz-zalza taghom stess.

 

Alfred Grech

09.10.2022.