Mhemm Xejn.

 

Mhemm xejn għajr msaġar folti

Li qatt ma raw ix xemx

U mrieżaq ta’ dawl li skappa

Id-dalma marsusa tal-bosk.

Mhemm xejn, hemm skiet u ħemda

U ħlewwa mistħajjla tal-melodija

Li ġejja minn zminijiet oħrajn.

Hemm iċ-ċpar li jaħbi l-ġejjieni

Ta’ xefaq opak mingħajr trufijiet

Hemm l-għoljiet li l-qċaċet tagħhom

Ma jintlaħqux

Ma jingħarfux

U l-ilmijiet tal-għadajjar iwelldu l-ħolm tal-insetti.

Hemm ħdura li mhix minn dawn l-inħawi

Għax tinbidel u ssir minn kull lewn

Hemm oqsma bla tmiem fejn jista’ jimraħ ħsiebek

Sa jixxabbat mal-eqreb għoljiet

U jmiss saħansitra l-qawsalli

Hemm sħab efimeru li ma tfissrux

U nżul ix-xemx li jmur lilhinn mill-eqreb xtajta.

Hmura li tintebaħ biha xħin isir tard wisq

U xħin id-dellijiet jiġġiganteġġjaw ma ħitan ta’ swar minsija.

Skolji li jħadduhom oċeani primittivi

Mibduli f’pedestalli għal sireni seduċenti

Imwieżep ta’ ilma nadif li jserrep ġol-widien

Minn fejn ir-ruħ trid tibda’ l-mixja tagħha

Lejn kanċelli li jaqbżu s-sisien.

 

Alfred Grech

12/11/2022.