Imqar ‘Kk Ma Nitkellmux.

 

Imqar ‘kk ma nitkellmux  il-leħen tiegħi

Int tgħaraf kull xħin nikteb poeżija,

Fid-dlam li hemm bejnietna stajt tilmaħni

U hekk sirt taf li jiena mhux bħal ħaddieħor.

 

Kien hemm il-baħar jaqsam ta’ bejnietna,

Iżd’int waqajt mis-sema u ġejt ġo ħoġri,

Jien bżajt li mqar hawnhekk mhux ser ninftiehmu,

Għalkemm it-tnejn imdawwra madwar mejda.

 

Jien stajt nissinkronizza l-arloġġ tiegħi

Mal-ħin tiegħek: iżd’int dlonk bdejt titbissem.

Kont taf x’ser ngħidlek qabel ma ftaħt ħalqi

U jiena fhimt li kellha tkun darb’oħra.

 

Alfred Grech

10/08/2023