Ħallini.

 

Ħallini nintilef fil-bur bla konfini,

Ħallini nintilef fit-tul ta’ bla tmiem,

Ħallini niġġerra fuq l-andar, fil-plajja,

Sa nilħaq ix-xefaq xħin niġri ’l-quddiem.

 

Ħallini ħa noħroġ mill-qxur ta’ dil-fosdqa,

Dirgħajja nwessaħħom u nħaddan il-ġid

U għinni biex nieqaf mill-ġdid fuq saqajja,

Darb’oħra nitwieled , nirxoxta mill-ġdid.

 

Insib iż-żmien kollu biex miegħek nitkellem

U nersaq u nirfes l-ispazji ta’ ħdejk,

Infittex li nirgħa’ kull fejn hemm il-ħlejju

U tiddi fuq wiċċi d-dija t’għajnejk.

 

Ħallini ħa nerġa’ nitrejjaq mill-għasel

U nisma’ xi jqanqal l-ispirtu mifxul,

Il-qalb li bdiet tħabbat għax messet ix-xrara,

Xintilla li tolqot ’l-bniedem mibdul.

 

Ħa nieħu ftit nifs ‘mma mhux fl-arja moqżieża

Ta’ min qatt ma ntrefa jew stagħdar fit-tajn,

Ta’ min qed jintrass u jrid jirbaħ bl-imgħawweġ

Ta’ min hu stunat, ma jixbaħx lill-oħrajn.

 

Ningħalaq mhux aktar fil-ħabs ta’ madwari,

Imdawwar bil-ħażen, bil-vizzji u tidwir,

Ta’ min qiegħed jgħix ġewwa sħaba ta’gideb

U jtella’ l-faċċati biex jaħbi t-tinwir.

 

Alfred Grech.

25/09/2023