Imwejġiet

  Issa Li Rġajt Bdejt Ngħanni.   Issa li rġajt bdejt ngħanni Ma baqgħalix il-ħin Insur wara kull kelma U l-ilma qed inixxi minn taħt minn taħt il-ġebel U jifqa’ qed l-għelieqi. Xħin ir-ruħ tiżvina l-għatx mhux ser jinqata’. Naqtagħlek warda minn ġo ġnien ħajti U noffriehelek bħala xhieda Ta’ kemm jien għadni nħobbok.   Alfred Grech 31/07/2023

Fit-Tarf tal-Preċipizzju.   Miniex beżgħan Min-nuqqas ta’ sejħa tiegħek Nirfes il-kallijiet Jew ngħaddi minn fuq il-ġamar Ta’ mħuħ li qed ibattu Fl-għabex tal-allat Ngħlaq għajnejja Għall-kull ma jista’ jiġri. Imbagħad ngħid Ma kellix mod ieħor kif kelli nimxi. U ma niddejjaq xejn Jekk ma tgħidlix fejn hu It-tarf tal-preċipizzju.   Alfred Grech 26/07/2023

  Kalzri.   Dan kalzri li minnu rrid naħrab Biex għada nispiċċa mar-riħ, Jew noħroġ nixxiegħa minn blata Bil-ħatar inxebba bis-sħiħ   Bid-dmugħ qed iżerżaq m’għajnejja Bid-dieqa ta’ sabar bla kejl Tisfira ta’ grillu li tidwi U tisgħar fis-skiet ta’ mal-lejl.   Trabokk dan t-għassfur li jittajjar Viżjoni ta’ xefaq bla tmiem Maħkum mill-irwiefen tal-ħajja U l-qilla tal-ajru bla lġiem.   Alfred Grech 25/07/2023

  Skiet.   Tifimha biss jekk tidħol ġo qoxortok Inkella tħarrek ċagħqa minn tax-xtajta, Hemmhekk fejn qatt ma morna nkella għexna Taħt xemx li taqli l-iġsma qed jixxemxu. Hemmhekk fis-skiet jirbombja ta’ madwarna Fejn tgħaddi minn ġol-masġar mingħajr biża’, U tfesdaq ħsibijiet mingħajr ma tiżen. Għalhekk tixtieq li taqta’ dis-sekwenza Fejn ħafna loanqas jafu sewwa sewwa X’hemm ġo das-skiet; is-skiet tal-eżistenza.   Alfred Grech 19/07/2023.

  180.   X’ikun il-waqt li minnu ridna ng ħaddu, Trapass mingħajr taħbit u daqq ta’ trombi, Kull mewġa li fil-wiċċ sabitna ngħumu Żammitna aljenati għal kull ħabta, Ma skoll jew blat li qatt ma stajna nirkbu; Inkella li wasslitna fuq ix-xtajta Fejn stajna niġbru lura lilna nfusna Mill-fdalijiet u l-bċejjeċ tan-nawfraġju. Fit-tul saquna l-ħalel u l-irwiefen, Il-qawwa tad-destin u x-xorti kiefra, U fhimna skond kull wieħed l-għażla tiegħu. Ħażżiżna wkoll kull waqt li għadda minna Fiċ-ċpar u fl-umdita’ ta’ għodwa ġdida Biex dawk li jiġu wara jiftakruna.   Alfred Grech 16.07.2023.

  179.   Ma nafx jekk huwiex int inkella jiena Dardarna tal-għadira l-ilma qiegħed, Qanqalna l-wiċċ li jirrifletti s-sema. Aktarx li kien il-ħolm li qatt ma ħlomna, Il-ħmar il-lejl li ġiegħlna nagħmlu l-ħwejjeġ Li aħna t-tnejn imissna qatt m’għamilna. Ma nafx jekk kienx il-ħoss ta’ kull ċaqliqa U f’daqqa waħda qomna minn dir-raqda Biex issa sibna ruħna qed interrqu Ġo toroq u sqaqien fejn qatt ma konna. U xħin ħarisna f’wiċċ xulxin nistagħġbu Kif ħadd ma ħareġ għadu bit-tweġiba. Intbaħna li għalina l-wisa’ kollu Hu hawn il-fuq mis-sħab fejn qed nittajjru.   Alfred Grech 14/07/2023.

  Muża .   M’għadiex toħroġ u tittajjar; M’għadiex toħroġ kif nixtieq; M’għadiex tofroq barrikati Sew fil-ferħ u sew fid-dieq.   M’għadiex tlellex u titttajjar M’għadiex warda minn ġol-ġnien Lanqas f’waqt li   lili tħenni M’għada tiġi minn x’imkien.   Lanqas naf x’ser naqbad nagħmel Biex inkebbes nerġa’ x-xrar, Għandix lura nerġa’ nterraq U nfittixha mqar fiċ-ċpar.   Alafred Grech 08/07/2023.  

  Int Biss Sirena.   Iint biss sirena b’wiċċ ieħor titbissem U jien vulkan marsus dalwaqt jżbroffa. Iint biss sirena  tgħanni l-krib virtwali Is-sensazzjoni ta’għanja mhix mistħajjla Iżżeffen il-lament ta’ min hu mwarrab U tqanqal fit-turment l-awgurju t-tajjeb. Nixxiegħa inti tgelgel gliegel nodfa. Int biss tal-qtiegħ il-qalb tibgħatli l-bżieżaq Tas-sapun li jinfaqgħu kollha f’wiċċi, Int biss tnewwili jdejk biex flimkien ngħosfru Fir-rgawwa u fir-raxx ta’ mewġ il-baħar.   Alfred Grech 06/07/2023.

  Stajt Ġejt Hawn.   Stajt ġejt hawn fid-dawl tax-xemx Nirrifletti r-raġġi tagħħa B’fanal f’idi nfittex raġel;   Jew ġejt hawn fuq l-istazzjon Biex iġġorni ferrovija Lejn il-vjaġġ li qatt m’għamilt;   Jew stajt naqra dak il-ktieb Biex jeħodni fil-pajjiż Illi fuqu nista’ nirfes.   Niġi hawn qalb folla nies Li jitkellmu b’ilsna ġodda Fost it-torrijiet li bnew.   U għad nikteb narrattiva U nsejjġilha: Grajja Tiegħi.   Alfred Grech 05/07/2023.