Imwejġiet

  Ma Tistagħġibx .   Ma tistagħġibx xħin tħares lejja Il-mera ma tigdibx Jien riflessjoni tiegħek Imqar jekk mintix ħlief ħsieb.   Xħin għaddejt għan-naħħa l-oħra Int kont għadek il-baħħ tal-bieraħ Inkella l-ħares li bih webbluna Sa meta konna żgħar.   Inkella drajna r-ritmu Tal-mewġ jaħbat mal-blat Inkella għad ma kienx il-waqt.   AAlfred Grech 30/08/2022.

  Quddiem Ir-Riħ li Jonfoħ.   Quddiem ir-riħ li jonfoħ Il-poeżija tfewwah Weħida tmil u tishar Fi-nżul ix-xemx li jnewwaħ   U waqt dis-siegħa ħamra Ta’ xemx li tinżel f’daqqa Fuq xfar il-għajn ir-raġġi Lis-sħab s-sema jraqqa’.   Fis-skiet ta’ lejl li jaqa’ Bil-qtar is-solitudni Kull waqt jintilef ħieles Fl-ibħra tal-multititudni.   Weħidha tiġi ħielsa Imqar jekk mhix mirquma F’waqtiet bla qiegħ li jinfdu Imrażżna jew mirduma.   U jiena nibda nikteb U nerġa’ bħal nitħajjar Inxidd il-qorq tal-ġwienaħ U arani qed nittajjar.   Alfred Grech 31-08-2022.

  Inutli Aħna.   Inutli a ħ na f’din il-bitħa mdallma Nippassiġġaw bla fejda wara dellna Jew nistennew li għad iddoqq qanqiena Fenomeni ta’ ħmar idur mas-sienja.   Inniżżlu lil-allat minn fuq olimpu Biex ngħidu illi tagħna destin wieħed. Iżd’huma xejn ma jħabblu rashom bina U  aħna ninkinaw bit-talb quddiemhom.   Alfred Grech 28/08/2022.

  Dellijiet ta’ Skiet u Ħemda.   Dellijiet ta’ skiet u ħemda Mgħarrqa f’baħar ta’ bla kejl Bi tbissima fuq il-bjuda Jew fit-telqa ta’ bil-lejl.   U f’xi mkien tas-solitudni Taħt l-istar ta’ swied il-qalb Jew mitluf taħt kewkba siekta Qalb il-wens ta’ ħafna talb.   Biex fuq zkuk is-siġar għerja Tinbet xrara tad-divin Bħal storduta tibda tfittex Fejn ser tolqot u lil min.   Qalb l-imsaġar li jissieltu F’din is-siegħa ta’ qawmien Jiena nerġa’ nrabbi l-ġwienaħ U għal-għandek minnufih.   Din mhijiex it-tranżlazzjoni Ta’ xi mit jew ħmar il-lejl Din hi biss epifanija Ewforija ta’ bla kejl.   Alfred Grech 27/08/2022.

    Jekk Ma L-Art.   Jekk ma l-art int bdejt titmiegħek Għad timtela’ ħmieġ bla qies Jekk il-libsa li fasslulek Saret togħġbok, int sirt nies.   Jekk stedintni fi Ġnien l-Għeden Jiena niġi bla ma ndum Għax hemmhekk mhux se jsibuna Jonsbu nasba ta’ kuljum.   Jekk qed tħossok kif ħassejtek Kif kont tħossok int u ddur Bħal żugraga f’nofs l-ispazju Żid il-ġiri kull ma jmur.   Trid tinħeba u trid tistaħba Trid tistkenn mill isparar Iżda dak mhux għajr il-biża’ Li tispiċċa fuq in-nar.   Alfred Grech. 26/08/2022.    

  Meta.   Meta kollox jibda’ jinten U inti lanqas tibqa’ xxomm Meta għan-niżla tibda nieżel U ma mkien ma tista’ żżomm;   Meta kollox jidher wieqaf, Meta tqum mingħajr aptit ix-xemx tisreġ bla għarixa meta s-sħana qed iżżid.   Tibda tħoss li wasal l-aħħar U x’qed jiġri int ma tafx Għax id-dinja ta’ madwarek Tibqa’ għaddejja u ma tieqafx.   Alfred Grech. 25/08/2022.

  Xadini.   Ix-xadini fuq s-siġar Ħlief jixxabbtu ma jafux Jew qed jagħmlu ta’ bir-ruħhom Illi għadhom ma ntebħux.   Għax dawn moħħhom biex jixxabbtu U jitilgħu biss il-fuq Dan jagħmluh imqar in-nemel Li jistaħba qalb ix-xquq.   Għax kemm tista’ titfa’ nemel U tgeżżiżhom fuq xi iskoll U kemm tista’ ttella’ bini? Tagħna   dad-destin ukoll.   Ejja   nagħlqu wkoll għajnejna Qisu mhu qed jiġri xejn, Huma moħhom biex jixxabbtu U aħna nibqgħu bejn ħaltejn.   Għax jekk dan hu tort tas-siġar Inqaċċtuhom minnufih Naqalgħuhom min għeruqhom U niġbduhom sa mill-qiegħ.   U x-xadini mingħajr siġar Fejn jixxabbtu ma jsibux ’kk mhux ma sies żellieq u niexef U b’hekk jitgerrbu ma jdumx.   Alfred Grech. 24/08/2022.    

  Mintix Ħielsa.   Mintix ħielsa li tagħmel dak li trid Għalhekk qed tgħix il-gidba Għaliex xħin tilgħab ma ħaddejk iż-żiffa M’għandekx il-ħila tkisser Il-ktajjen tal-waqtiet U tinżel f’infern it-tqanqiliet Li jsiru bżieżaq arja jinġarru mal-kurrenti..   Trid toqgħod tgħum fil-wiċċ Bħal dgħajsa mingħajr qlugh U bla moqdief miluqa Fil-baħar tax-xewqat U l-mewġ ta’ dak il-ħin.   Tinbela’ għax taf Li dan maltemp efimerali.   Imbagħad tiġik il-leħma Biex tikteb poeżija.   Alfred Grech. 20/08/2022.

  EFIMERA.   Quddiem il-bastjun   tieg ħek Kull għadu jitwerwer u jinħall Jieqaf it-tiġrib kollu U jien inħares lejn il-qawwa u l-kobor ta’ ġmielek Kull għajn tiċċassa.   Int trid tibqa’ ninfa tal-iskandlu Bint l-stħajjil U ħaddieħor jaqta’ nifsu Ilaħħaq mal-passi tiegħek. Seħer li għaddi ta’ kuljum minn fuqi Bħalma tgħaddi ż- żiffa mielsa Ta’ nċens ifuh minn imnifsejja.   Għalkemm qatt ma jintela’ l-bir, Kull qatra xita tgħodd.     Alfred Grech 19/08/2022.

  Għaġna.   L-imħabba lejk b’taż-żmien mimlija toqol Tal-qtigħ il-qalb u dak li nġorr fuq dahri Hu biss xħin jgħaddi ż-żmien li jien nintebaħ X’inkun tlift, x’ħallejt jaħrab minn idejja.   Għaliex l-imgħoddi biss persekuzzjoni             Li joħnoq l-innoċenza ta’   li rridu Fis-sbuħija ta’ dak li għandna nagħmlu. L-akbar theddida għal ħelsien hi l-għaġna Li fiha mdorrijin sa mill-benniena.   Afrd Grech. 15/08/2022.

      Nixtieq Naf X’Inhu.   Nixtieq naf x’hinu għalik Dan li tixrob mill-istess kalċi Li minnu jiena nixrob. Għalija dan velenu. Għalik dan mhux ħlief sokor U ħarba f’dawl  il-jum Bejn tarġa’ u oħra F’dan it-taraġ li ta’ kuljum nitilgħu. L-għanja tiegħek tħammarli wiċċi Għax saret il-maħbuba Li tilfet it-triq U kull ma baqgħalek Huma l-ħsejjes minn taħt l-ilsien Li jaħarbu jiġru Fit-toroq ta’ djar mitluqa. Aħna nibqgħu atturi kontra qalbna F’dit-traġedja li ma bdejniex aħna.   Alfred Grech 12/08/2022.              

      Ma Rridhom Qatt Li Jgħaddu.     Ma rridhom qatt li jgħaddu Dal-waqtiet riflessi fil-mera Ta’ għadira rieqda u mhix imdardra Fejn lanqas jibqgħu jgħoddu r-ritmi ħielsa Ta’ vrus imbewsa.   Ma rridhom qatt li jgħaddu Dal-waqtiet ta’ skiet imġiegħel Imgeddsa qalb in-nagħas Ta’ dinja li tillfet id-dawrien tagħha.   U lili ħadd ma jlumni Jekk issa noqgħod ftit għal-ġenb Impejjep il-ħolm ta’ droga mhix projbita U nfesdaq il-ġagulatorji Bħal meta ħsibt li sirt qaddis Għax ksibt it-triq tal-ġenna.   Alfred Grech 09/08/2022.  

  Lil Ommi.   U issa mqar jiena nħoss li m’għadnix magħkom M’għadnix hawn Għax qbist in-naħħa l-oħra tax-xmara Fejn ma jimpurtax hekk għada Baqax xi xemx li tista’ titla’ Inkella jekk l-ilwien li konna nżewwqu Tilfux il-lostru tagħhom.   Issa ninsab fis-sotterran tal-griż Fejn la hemm dlam u lanqas dawl Fejn il-biki biss hu t-tnegħida Illi toħroġ mir-ruħ li tibqa’ tnemnem Bħal musbieħ tat-trapasss lejn l- għabex etern. U hekk nista’ nibda ħajja ġdida Minflok l-irxoxt minn bejn l-imwiet. U issa bħal Scrooge Nibda’ nara l-futuribbli.   Alfred Grech 08-08-2022.  

  Jien Ma Nafx.   Jien ma nafx nar aktar jaħraq, Jien ma nafx agħar ġewx xi sjuf, Jien ma nafx hemmx kalamita Li tiġbidni lejn it-truf.   Ma narax id-dlam kif jinżel Imma d-dlam hu qtar ir-ruħ; Jien ma nafx għax filgħaxija Jegħrqu l-kwiekeb f’baħar dmugħ.   Jien ma nafx għaliex din l-għanja Li tgħallimna ta’ tfal żgħar, Insejniha tlifna l-ħlewwa Kull ma jmur sejrin għall agħar.   Tista’ twaqqaf din il-mixja Tista’ twaqqaf, Le? Għaliex? Mill-irdum għal isfel waddab U lil ħadd tistaqsi: għaliex.   Alfred Grech 02/08/2002.